{loadnavigation}

Guillaume de Machaut (1300-1377)
Recueil : Chants

Aymi ! dame de valour

 

 

Aymi ! dame de valour,
Que j’aim et desir,
De vous me vient la dolour
Qui me fait languir.

Tres douce creature,
Comment puet vo fine douçour
Estre vers moy si dure,
Quant mon cuer, mon corps et m’amour
Vous ay donné sans retour
Et sans repentir ?
Or me tenez en langour
Dont je criem morir.
Aymi ! dame.

Et tout par enmesure,
Gentil dame, pleinne d’onnour,
Sui je à desconfiture;
Car onques ne quis deshonnour
Vers vous, ains ay sans sejour
Fait vo dous plaisir
Et feray sans mauvais tour
Jusques au morir.
Aymi ! dame de valour.

Mais vo douce figure,
Vo fine biauté que j’aour
Et vo noble faiture
Parée de plaisant atour
En plour tiennent nuit et jour,
Sans joie sentir,
Mon cuer qui vit en tristour,
Dont ne puet garir.
Aymi
! dame de valour,
Que j’aim et desir,
De vous me vient la dolour
Qui me fait languir.